De Lima kay Bato: Akusado ka, judge ka rin?

MANILA, Philippines — Kinuwestiyon ni dating Sen. Leila de Lima ang plano ni Sen. Ronald “Bato” Dela Rosa na imbestigahan ang madugong “drug on war” ng nakaraang administrasyon dahil isa ito sa mga inaakusahan sa madugong Oplan Tokhang.

“Puwede ba ‘yun na ang isang inaakusahan, isang ini-implicate ay siya rin ang magha-handle ng isang hearing, baka nga mag-preside din? Puwede ba ‘yun akusado ka, ta’s magiging judge ka rin?” ani De Lima.

Sinabi ni De Lima na may “basic ethical issue” kung isa sa mga mag-iimbestiga o mamumuno sa imbestigasyon si Dela Rosa.

“There is a basic ethical issue there. Kung iba sana ang mag-preside, puwede. Pero ‘yung sila at magpa-participate sa pagtatanong pa, I don’t think that is proper… Katawa-tawa nga,” ani De Lima.

Ipinaalala ni De Lima na noong akusahan siya ng aminadong drug lord na si Kerwin Espinosa na tumatanggap ng pera mula sa droga noong 2016, iniwasan niyang makisawsaw sa cross examination dahil makukuwestiyon ang kanyang rason sa pagtatanong.

“May self-interest ako na ako mismo ‘yung ini-implicate, siyempre dedepensahan ko at didiinin ko ‘yung nag-iimplicate sa akin. Is that fair?” ani De Lima.

Matatandaan na dahil sa testimonya ni Espinosa ay nakulong ng ilang taon si De Lima.

Sa pagdinig ng House quad committee, iginiit ni Espinosa na pinilit siya ni Dela Rosa na isangkot si De Lima sa kalakalan ng ilegal na droga.

Para naman kay Laguna Rep. Dan Fernandez, co-Chairman ng House Quad Committee, malinaw na ‘conflict of interest’ at kawalan ng delicadeza ang ikinakasang pagsasagawa ng imbestigasyon ni Dela Rosa.

Ipinunto ni Fernandez na may mahalagang papel na ginampanan si Dela Rosa sa Duterte war on drugs campaign dahil siya ang hepe ng PNP nang ipatupad ito.

“Delicadeza na lang sana ang pairalin ni Sen. Bato. For me it is highly inappropriate for him, the chief enforcer of the drug war, to lead a probe into the very operations he designed and implemented,” ayon kay Fernandez.