Indonesia walang request sa ‘palit ulo’ kay Alice Guo

MANILA, Philippines — Inihayag ng Department of Justice na wala pa silang natatanggap na official request mula sa Indonesian government hinggil sa umano’y “palit ulo” sa naarestong si dating Bamban, Tarlac Mayor Alice Guo.

Ayon kay Justice Undersecretary Nicky Ty, wala pang opisyal na pakiusap o hiling ang Indonesia kaugnay sa isyu ng “palit ulo” sa Australian national Gregor Johan Haas, na most wanted sa bansa dahil sa kaso ng drug smuggling.

“Huwag natin pangunahan, ano?, ani Ty.

Una nang sinabi ni Justice Secretary Jesus Crispin Remulla na may ilang kondisyon para sa deportation ni Guo na nadakip sa Tangerang, Indonesia.

Una nang lumutang ang isyu na hinihiling umano ng Jakarta Police na ipagpalit si Guo kay Haas, na nakapiit sa Pilipinas.

Napag-alaman na si Haas ay nadakip ng Bureau of Immigration sa San Remigio, Northern Cebu noong Mayo 15, 2024 bunsod na rin ng Interpol red notice.

Personal na nagtungo kahapon sina DILG Secretary Benhur Abalos at PNP chief Gen. Rommel Francisco Marbil sa Indonesia upang sunduin si Guo.

Sinabi rin PNP-Public Information Office (PIO) chief Colonel Jean Fajardo na agad na iti-turn over si Guo sa Senate Sergeant-at-Arms.

Samantala, naglabas na ng warrant of arrest ang RTC ng Branch 109 ng Capas, Tarlac laban kay Guo para sa kasong paglabag sa Republic Act 3019 o Anti-Graft and Corrupt Practices Act.