Pinas ‘di sasabak sa giyera vs China

MANILA, Philippines — Hindi sasabak sa giyera ang Pilipinas laban sa China dahil ang planong irebisa ang 73 taong Mutual Defense Treaty (MDT) sa Estados Unidos ay naglalayong pigilan lamang ang tumitinding agresyon at pambu-bully ng mga Intsik sa pinag-aagawang teritoryo sa West Philippine Sea (WPS).

“Nothing will be changed in the MDT. It’s just that we don’t want to get canalized on an attack of an armed vessel. It’s more for strategic purposes because China used a non-lawful system of aggression which a static interpretation and static processes will not address,” pahayag ni Defense Secretary Gilberto Teodoro Jr.

Ang DND at mga ahensiyang nasa ilalim nito ay humihirit ng P258.16 bilyong pondo para sa taong 2025 mula sa kasalukuyang outlay na nasa P242.39 bilyon. Dahil sa maayos na pagpapaliwanag ni Teodoro sa pondo ng DND ay mabilis itong nakalusot sa House Committee on Appropriations.

Ini-highlight ng Defense Chief ang istratikong paglipat ng pokus ng DND mula sa pagtugon sa panloob na seguridad sa depensa sa teritoryo. Nilalayon nito na matugunan ang mga hamon sa seguridad na kinakaharap ng bansa sa gitna na rin ng tila hindi paawat na pagiging agresibo ng China sa WPS.

Ipinaliwanag rin ni Teodoro na kung mapalitan man ang ilang probisyon ng MDT ay walang madadagdag na EDCA sites.

“No, your honor. This does not entail additional EDCA sites because we are sticking to the nine EDCA facilities, but it entails perhaps interoperable measures to address China’s creative and varied tactics on a defense-to-defense level,” giit ni Teodoro.