Marcos: Walang human rights violation sa PNP ops sa KOJC

MANILA, Philippines — Walang nakikitang human rights violation si Pangulong Ferdinand Marcos Jr. na may pang-aabuso sa operasyon ng Philippine National Police (PNP) sa Davao City.

Sinabi ng Pangulo na walang armas at hind gumamit ng tear gas ang mga pulis sa paghahalughog sa compound ni Quiboloy.

“Meron bang human rights violation kung maraming pulis? I don’t think so. The reason we did this was so that we can contain the peace,” sinabi pa ng Pangulo.

Iginiit pa ni Marcos na ang isang paraan para mapanatili ang kapayapaan ay masiguro na ligtas at secure ang lugar dahil mayroon itong 30-ektaryang compound kaya kailangan ng maraming tao at hindi ito maaaring gawin lang ng isang dosenang pulis.

Kasabay nito, nanindigan naman ang Pangulo na walang halong pulitika ang pag-aresto kay Quiboloy.

Ang dapat aniya ay sumuko na lamang si Quiboloy para matapos na ang gulo at huwag nang idamay at isabak ang kanyang mga tauhan na wala namang kasalanan.