Smallpox vaccine, gagamitin vs Mpox
![Smallpox vaccine, gagamitin vs Mpox](https://media.philstar.com/photos/2024/08/22/2_2024-08-22_22-17-53.jpg)
MANILA, Philippines — Gagamitin umano ng Department of Health (DOH) ang smallpox vaccine bilang proteksiyon laban sa Mpox.
Kinumpirma ni Health Assistant Secretary at Spokesperson Albert Domingo na nagpaabot na ang DOH ng intensiyon sa World Health Organization (WHO) na mabigyan ang Pilipinas ng access sa smallpox vaccines upang magamit na proteksiyon laban sa Mpox.
Ayon kay Domingo, base kasi sa scientific findings ang smallpox vaccines ay nakapagbibigay ng cross-protection laban sa Mpox.
Gayunman, wala pa aniyang suplay ng naturang bakuna sa Pilipinas.
Ani Domingo, inuuna muna kasing mabigyan ng mga naturang bakuna ang mga bansa sa Africa, kung saan nagkakaroon ng krisis sa ngayon dahil sa hawahan ng Mpox.
Ayon pa sa DOH, ang virus na tumama sa ika-10 kaso ng Mpox na naitala sa bansa ay ang mas mild na ‘MPXV Clade II.’
Ito ay base sa isinagawang sequencing ng Research Institute for Tropical Medicine (RITM) sa monkeypox virus (MPXV) deoxyribonucleic acid (DNA) sample na nakolekta sa pasyente.
Ayon sa DOH, ang Mpox na dulot ng monkeypox virus (MPXV) species ng Orthopoxvirus genus, na unang nadiskubre sa mga laboratory primates sa Denmark noong 1958 at malaunan ay naobserbahan sa mga tao noong 1970. Pinalitan umano ang pangalan ng sakit ngunit hindi ang virus nito.
Mayroong dalawang major group ang MPXV, na tinatawag na “clades” o Clade I at Clade II, kung saan ang Clade II ang mas mild.
Una nang kinumpirma ng DOH na naitala na nila noong Agosto 18 ang unang kaso ng Mpox sa bansa ngayong taon.
- Latest