Senado pinababasura sa SC petisyon ni Quiboloy
MANILA, Philippines — Ipinababasura ng Senado sa Korte Suprema ang petisyong inihain ni Kingdom of Jesus Christ Pastor Apollo Quiboloy sa inisyung arrest order laban sa kanya ng Senate Committees on Public Order at Dangerous Drugs and Women and Children.
Sa komentong inihain ng Office of the Solicitor General (OSG) para sa Senado, hiniling ni Solicitor General Menardo Guevarra sa SC na ibasura ang aplikasyon ni Quiboloy para sa temporary restraining order (TRO) at writ of preliminary injunction.
Ayon kay Guevarra, si Quiboloy ay hindi entitled na humingi ng ‘relief’ dahil malinaw aniya na wala naman itong intensiyon na isumite ang kanyang sarili sa proseso ng hukuman at ng Senado.
Idinagdag pa ni Guevarra na ang isinasagawang imbestigasyon sa Senado ay ‘in aid of legislation’ at ang inbokasyon ng pastor ng kanyang constitutional right against self-incrimination ay wala sa lugar.
Paliwanag ni Guevarra, “In this case, petitioner is being summoned as a resource person in a Senate inquiry and not as an accused in a criminal trial, hence his attendance is mandatory.”
Matatandaang si Quiboloy ay inisyuhan ng mga komite ng Senado ng warrant of arrest matapos mabigong dumalo at isnabin ang subpoena sa isinasagawa nilang imbestigasyon laban sa mga umano’y pag-abuso nito.
Bukod sa Senado, si Quiboloy ay inisyuhan din ng warrant of arrest ng mga hukuman na humahawak sa mga kinakaharap niyang kasong qualified human trafficking at child and sexual abuse.
Mariin namang pinabulaanan ni Quiboloy ang mga naturang akusasyon.
- Latest
