VP Sara ‘di dadalo sa SONA

MANILA, Philippines — Kinumpirma kahapon ni Vice President at outgoing Department of Education (DepEd) Secretary Sara Duterte na hindi siya dadalo sa idaraos na State of the Nation Address (SONA) ni Pang. Ferdinand “Bongbong” Marcos Jr. sa Hulyo 22.

Matatandaang marami ang nag-aantabay kung dadalo ba ang bise presidente sa SONA ng Pang. Marcos matapos siyang magbitiw sa gabinete ng pangulo noong nakaraang buwan.

“No, I will not attend the SONA…  I am appointing myself as the designated survivor,” ayon naman kay Duterte, nang makapanayam ng mga mamamahayag sa inagurasyon ng Child and Adolescent Neurodevelopment Center sa isang pagamutan sa Davao City.

Ito ang unang pagkakataon na hindi dadalo ang bise presidente ng SONA.

Pinalagan naman ni Manila 3rd District Rep. Joel Chua ang umano’y hindi magandang patawa ni VP nang sabihin nitong itinatalaga niya ang kaniyang sarili bilang “Designated Survivor” kaya wala siyang planong dumalo sa joint session ng Kongreso para sa ikatlong SONA ni Pangulong Marcos.

Hindi anya dapat gawing katawa-tawa ang seguridad ni Pangulong Marcos.

“Such a joke is not in good taste because the security of the President of the Philippines is not a joking or laughing matter. Great care is taken to ensure the security of the President, especially during the SONA,” saad ng solon.

Ayon kay Chua, anupaman ang tensiyon sa pulitika ay hindi dapat nagbibiro ng masama ang ikalawang Pangulo lalo na aniya at sa usapin pa ng kaligtasan ng Pangulo ng bansa.

“Strictly speaking, Vice President Sara Duterte does not have that appointing power for a designated survivor because it is the 1987 Constitution that designates the Vice as the first next in line to succeed the President,” punto ni Chua.

Una nang nagbitiw si Sara bilang kalihim ng Department of Education (DepEd) at vice chairperson ng National Task Force to End Local Communist Armed Conflict (NTF-ELCAC), epektibo sa Hulyo 19.