22K pulis ikakalat sa ikatlong SONA ni Pangulong Marcos
MANILA, Philippines — Tiniyak ni National Capital Region Police Office (NCRPO) chief PMGen. Jose Melencio Nartatez Jr. na kasado na ang seguridad sa ikatlong State of the Nation Address ni Pangulong Ferdinand R. Marcos Jr. sa Hulyo 22.
Ayon kay Nartatez, nasa 22,000 pulis at force multipliers ang ikakalat sa SONA sa iba’t ibang lugar sa Metro Manila upang masiguro na magiging maayos paglalahad ng accomplishments ng Pangulo.
Bumuo na rin sila ng Security Task Force SONA 2024 para tiyaking maayos ang SONA gayundin ang mga dadalo sa Kongreso.
Mula sa nasabing bilang, sinabi ni Nartatez na halos 18,000 pulis ang mula sa NCRPO, habang 2,000 mula naman sa karatig na Regional Office gaya ng Central Luzon at CALABARZON.
Mahigit 2,700 naman ang magsisilbing force multipler o buhat sa iba pang ahensya gaya ng MMDA, Coast Guard, BFP, BJMP at mga Lokal na Pamahalaan.
May ipakakalat ding Medical Assistance desk sa mga lugar na pagdarausan ng mga pagtitipon at help desk na ilalagay sa areas of convergence.
Bukod sa mga lugar malapit sa Batasang Pambansa, sinabi ni Nartatez na may ipakakalat din silang tauhan partikular na sa EDSA Shrine sa Quezon City at Mendiola sa Maynila na posibleng pagdausan ng mga pagkilos.
- Latest
