Laurel, Herbosa lusot na sa CA

MANILA, Philippines — Nakalusot na rin sa Committee on Agriculture ng Commission on Appointments (CA) ang ad interim appointment ni Agriculture Secretary Francisco Tiu Laurel Jr. matapos ang pagharap nito sa kanyang confirmation hearing.

Si Tiu Laurel ay isang fishing tycoon, gayundin ay kababata at matalik na kaibigan ni Pangulong Ferdinand Marcos Jr.

Bago ang kumpirmasyon ay binusisi ni Sen. Risa Hontiveros ang posibleng impluwensya o “conflict of interest” ng kanyang mga negosyo sa ahensya kung saan tiniyak ng Kalihim na hindi papaboran ng mga patakaran ng DA ang mga kumpanya at negosyo ng kanilang pamilya.

Nagbitiw at na-divest na rin ng Agriculture Secretary ang lahat ng mahigit 60 kumpanya na pag-aari sa pamamagitan ng ‘deed of sale’.

“I am now 56 and I’ve been called to serve the country—to lead it out of high food prices; low food production; broken food supply chains; lack of irrigation, cold storage, credit, and other key inputs; and ageing farmers and fisherfolk. Add climate change and geopolitical disruptions to this mix, and the task to feed all 118 million Filipinos becomes even more daunting,” ayon pa kay Laurel.

Samantala, matapos na ma-bypass ng CA noong Setyembre, nakalusot na sa makapangyarihang komisyon si Health Secretary Teodoro Herbosa.

Nagmosyon si CA Majority Leader Cong. Luis Raymond Villafuerte na aprubahan na ng komite ang ad interim appointment ni Herbosa na siyang kinatigan naman ng mga miyembro.

Bago ang pag-apruba sa ad interim appointment ng kalihim ay maraming katanungan ang ibinato sa kanya ng mga mambabatas kabilang na rito ang mababang utilization ng pondo ng DOH para sa taong 2022, mga kontrobersyal na social media posts nito noong panahon ng pandemic laban sa mga healthcare workers, community pantry at red-tagging, napakatagal na distribusyon ng emergency allowances sa health care workers, interventions at repormang ilalatag sa Universal Health Care Law, at iba pang isyu sa departamento.