Duterte sinubpoena ng korte sa grave threat kay Castro

MANILA, Philippines — Inisyuhan na ng subpoena ng Quezon City ­Prosecutor Office si dating Pangulong Rodrigo “Digong” Duterte upang sagutin ang kasong grave threats na inihain laban dito ni House Assistant Minority Leader at ACT Teachers Partylist Rep. France Castro.

Sa subpoena na nilagdaan ni Quezon City Senior Assistant City Prosecutor Ulric Badiola, inatasan nito si Digong na dumalo sa Office of the City Prosecutor sa Justice Cecilia Muñoz Palma Building (DOJ) sa Elliptical Road, Quezon City sa Disyembre 4 at 11, 2023 dakong alas -2:30 ng hapon.

Kapag nagkataon, ito ang kauna-unahang pagkakataon na haharap si Digong sa paglilitis matapos ang termino nito bilang Pangulo ng bansa.

Inatasan din ng korte si Digong na magsumite ng kaniyang counter-affidavit kasama ang affidavits ng kaniyang mga testigo at iba pang mga dokumento.

“No motion to dismiss shall be entertained. Only Counter-affidavit shall be admitted. Otherwise, Respondent/s is/are deemed to have waived the right to present evidence,” ayon sa subpoena at nilinaw rin na walang pagpapaliban dito maliban na lamang sa mga insidenteng mayroong katanggap-tanggap na kadahilanan.

Pinadadalo din ng QC Prosecutors Office si Castro at mga testigo nito upang patunayan ang katotohanan sa nasabing alegasyon.

Nag-ugat ang kaso matapos umanong pagbantaan ni Digong si Castro na ang intelligence funds umano ay gagamitin niya upang ipapatay ang lady solon na sinasabing may ugnayan sa CPP-NPA.