‘Di tamang storage ng ­imported c­hicken sa palengke, delikado sa konsyumer

MANILA, Philippines — Delikado umano sa konsyumer kung ang mga imported na manok sa palengke ay hindi nailalagay sa tamang temperatura.

Sinabi ni Dr. Noel Lumbo, head ng Institute of Animal Science sa UP-Los Baños, na isa sa pinakamalaking problema ng mga imported na manok na binebenta sa palengke ay ang hindi tamang storage.

Aniya, nawawala ang meat cleanliness at sanitation ng mga manok kung hindi nailalagay sa tamang temperatura ang poultry meat.

“Isa ‘yan sa mga pinakamalaking problems sa atin, because our chickens are nakabuyangyang doon. Tumataas ‘yung kaniyang temperature to room temperature for more than how many day, how many hours. That is a no, no pagdating sa ano, pagdating sa meat sanitation or meat cleanliness,” paliwanag ni Lumbo.

“Pagdating sa wet market, doon nagkakaroon ng problem. Because ‘yung nakabuyangyang na ‘yon, ‘yun ang, pag hindi ‘yun naubos ibabalik n’ya agad ‘yun doon sa ano n’ya. Pero usually hindi sila nagfi-freeze, nakalagay ‘yan sa iced water.”

Paliwanag pa ni Lumbo, posibleng maging sanhi umano ng sakit sa mga konsyumer ang hindi tamang storage ng manok.