Doktor, ospital, bangko dawit
Sa PhilHealth anomaly
MANILA, Philippines — Ibinunyag ng “Task Force PhilHealth” na may mga doktor na sinasabing sangkot sa katiwalian sa Philippine Health Insurance Corporation (PhilHealth) at maging mga ospital at bangko na nagsilbing remittance centers sa maanomalyang transaksiyon.
Sinabi ni Undersecretary Mark Perete, tagapagsalita ng Department of Justice (DOJ), na dalawang dating konektado sa PhilHealth ang naging resource person na hiniling na huwag ilantad ang kanilang pagkilanlan, ang nagbigay ng impormasyon kaugnay sa fraudulent schemes sa loob ng korporasyon, sa ginanap na unang investigative meeting nitong Biyernes ng hapon, na tumagal ng 5 oras.
Kabilang aniya sa schemes ang pagbabayad ng ‘false’ o ‘fraudulent claims’, malversation of premiums, pambubulsa at exploitation o pagsasamantala ng ilan sa case rate system at ang interim reimbursement mechanism.
Binigyang-diin pa ng mga testigo ang diumano’y pang-aabuso at mga pagkakamali sa legal department at information technology office ng PhilHealth kaya lumaganap ang fradulent schemes.
Sinabi naman ni Justice Secretary Menardo Guevarra, na magsasagawa sila ng “fresh investigations” sa mga alegasyon sa PhilHealth na hindi pa kabilang sa imbestigasyon o audit matapos matuklasan ang pagkakasangkot ng third parties.
Dagdag pa niya, magsasagawa rin ng lifestyle checks sa mga nakalipas at kasalukuyang PhilHealth officials, na paulit-ulit na nababanggit ng mga resource persons at testigo para maiugnay sa isinasagawang anti-fraud at anti-graft investigations.
- Latest
