Tulong sa biktima ng masaker sa Bulacan, bumuhos

MANILA, Philippines — Bumuhos ang tulong sa pamilya ng mag-iinang minasaker sa Barangay Kaypian, San Jose del Monte City, Bulacan.

Sa press conference, sinabi ni San Jose del Monte City Bulacan Ma­yor Arthur Robes na aa­kuin na ng lokal na pamahalaan ang pagpapalibing sa tatlong mi­yembro ng pamilya Casabuena na kinabibilangan ng 28-an­yos na si Jaymee at dalawang anak na sina Anton Gabriel, 8, at Joaquin Mateo, 5.

Bukod sa financial assistance at trabaho sa overseas Filipino worker na ina ni Jaymee, inialok din ni Mayor Robes na mailibing sa sementeryo na pagmamay-ari ng lungsod ang labi ng mag-iina.

Nakipag-ugnayan na rin si Robes sa Social Welfare Department para alamin pa ang panga­ngailangan ng naiwang pamilya ng mga biktima ng masaker.

Dahil dito, kahit papaano ay napawi ang pagdadalamhati ng pa­milya Casabuena laluna ang OFW na ina ng namatay na si Jaymee at lola ng dalawang menor de edad.

Pinasalamatan din ni Mayor Robes ang San Jose del Monte City PNP sa pamumuno ni Police Lt. Col Orlando Castil Jr. dahil sa maagap na aksyon at agad na nahuli at hindi nakalayo pa ang mga salarin na kinilalang sina Wilson Nozal at Joselito Cortez.