Diskriminasyon sa OFWs pinasisilip

MANILA, Philippines - Hinimok ng Commission on Human Rights (CHR)  ang Kamara at ang Department of Foreign Affairs (DFA) na busisiin ang reklamo hinggil sa umano’y naganap na diskriminasyon sa hanay ng  mga overseas Filipino workers (OFW) mula Libya.

Partikular na pinaiimbestigahan ni CHR Chief Etta Rosales ang sinasabing sa sahig  lamang ng barko natulog ang mga OFW na na-repatriate mula Libya at hindi sila naasikaso ng sapat sa kabila na ang ibang mga banyaga pa ang sinasabing nasa maayos na kuwarto sa barko.

Idiniin ni Rosales na pinahahalagahan  ng kanilang ahensiya ang ginawa ng DFA para  matiyak ang kaligtasan ng mga OFWs na iuuwi sa Pilipinas mula sa Libya pero dapat din anyang isaalang-alang  ang mga karapatan ng mga tinaguriang bagong bayani ng kasalukuyang panahon.

Anya, may tinatawag na passenger bill of rights kung saan dapat na mabigyan sila ng patas na pagtrato sa kanilang karapatan bilang mga pasahero.

Sinabi ni Rosales na oras na busisiin ng Kamara at DFA ang usaping ito ay magsisilbing observer ang CHR hinggil sa naturang reklamo.