Mahigit 200 House bills naipasa

MANILA, Philippines - Mahigit sa 200 panukalang batas ang napagtibay at nasa 100 resolusyon naman ang nai-adopt ng Kamara sa pagtatapos ng first regular session sa ilalim ng 16th Congress.

Ito ang ipinagmalaki ni House Speaker Feliciano Belmonte sa kanyang talumpati kasabay ng pasasalamat sa lahat ng kongresista lalo na sa mga deputy speakers, Majority leader Neptali Gonzales at Minority leader Ronaldo Zamora.

Ibinilin din ni Belmonte sa kanyang sine die adjournment speech na bigyang prayoridad ang ilang panukalang batas kasama na ang Bangsamoro Basic Law at Anti-Political Dynasty bill sa susunod na regular session.

Hindi naman nito na­banggit ang isinusulong na Charter change o Chacha at ang Freedom of Information Bill at hindi rin nagbigay ng anumang pahayag kaugnay sa pork barrel scandal na kinasasangkutan ng ilang kongresista.

Kasabay nito, pinarangalan din si Belmonte ng Kamara sa pamamagitan ng isang resolusyon dahil sa mahusay nitong pamumuno.

Sinabi ni Marikina Rep. Miro Quimbo na naging challenging ang first regular session dahil araw-araw silang gumigising sa mga balitang nagde-demonize sa Kongreso subalit nalampasan nila ito dahil sa pamumuno ni Belmonte.

Nagpasalamat naman si Zamora kay Belmonte at Gonzales dahil sa trinato ng mga ito ang oposisyon sa Kamara na may respeto.