Multiple murder vs 6 CDO bombers

MANILA, Philippines - Sinampahan na ng kasong multiple murder at multiple frustrated murder ng Philippine National Police (PNP) ang anim na suspek na itinurong responsable sa madugong pambobomba sa isang bistro bar sa Cagayan de Oro City na pumatay ng 9 katao habang 48 pa ang nasugatan noong Hulyo 26.

Sa phone interview, inianunsyo na kahapon ni Sr. Supt. Michael Deloso, Special Investigation Task Group Cagayan de Oro City, na nagsampa na sila ng 8 counts ng multiple murder nitong Martes ng hapon sa City Prosecutors Office ng lungsod laban sa grupo na mga suspek na tumanggi nitong tukuyin ang pangalan dahilan si PNP Chief Director General Alan Purisima na umano ang bahalang maghayag nito sa media.

Tinukoy naman ni Interior and Local Government Secretary Mar Roxas na ang kinasuhan ay si Usman Hapids at limang iba pa.

Nitong Miyerkules ng umaga ay isinampa naman ang karagdagang 48 pang counts ng multiple frustrated murder laban sa grupo ni Hapids.

Si Hapids na hindi pa inihayag ng opisyal ang armadong grupong kinabibilangan ay natukoy umano sa composite sketch ng pulisya base sa deskripsyon ng mga testigo sa madugong pambobomba.

Sa post blast investigation ay 81mm high explosive mortar ang ginamit na main charge ng bomba na ang power source ay mula sa 9 volt eveready black battery ang initiator, may EBC electric blasting cap ang switch at two way radio ang triggering device na narekober sa blast site.