DENR officials pinakakasuhan

MANILA, Philippines - Hiniling kamakailan ni Agham partylist Rep. Angelo Palmones na kanselahin na ni Department of Environment and Natural Resources (DENR) Secretary Ramon Paje ang unang sertipikasyon ng ahensya (CNC-NCR-1104-0025) na nakapagbigay permiso na makapag-imbak ng tone-toneladang uling ang Harbour Port Center Terminal Inc. sa Rio Vitas, Tondo, Manila.

Hiniling din nito na kasuhan ang mga DENR officials at employees na nagbigay ng maanomalyang sertipikasyon na pumabor sa Harbour.

Ang naturang CNC ay ipi­nalabas umano kahit na walang ebidensya ng pagmamay-ari o karapatan para sa naturang lupang pinag-imbakan at sa kabila na ang paggamit dito bilang imbakan ng uling ay lumalabag sa kondisyon mismo ng CNC at ng writ of continuing mandamus na inilabas ng Korte Suprema nuon pang Disyembre 18, 2008. 

Ang mandamus ng Korte ay inilabas para protektahan ang kalikasan at yamang dagat ng Manila bay at mga karatig na lugar.

Sa sulat ni Palmones sa Ombudsman, sinabi nito na malinaw na paglabag sa mga batas at alintuntunin ang pagbibigay ng CNC ng hindi naipapakita ang katibayan ng pagmamay-ari sa naturang lote na pinag-imbakan ng uling.  Malinaw, ani Palmones may mga paglabag sa batas at pagsira sa kalikasan dahil sa ‘di tamang aksyon ng ilang opisyal at kawani sa DENR kaya dapat sila ay masusing maimbestigahan kasama ng ilang pribadong grupo.