People's Artist Award igagawad kay Pidol

MANILA, Philippines - Dahil sa kabiguan ng gobyerno na gawaran ng National Artist Award si comedy king Rodolfo “Dolphy” Vera Quizon, isa umanong maituturing na katumbas na pagkilala ang igagawad ng samahan ng mga artista, direktor, singers, composer, writer at mga civic leaders at NGO sa namayapang hari ng komedya.

Ayon kay singer Anthony Castelo, pangulo ng Dakilang Lahi Foundation, tatawaging People’s Artist Award ang ibibigay nilang parangal kay Mang Dolphy.

Sinisimbolo anya ng nasabing pagkilala ang pagbibigay hustisya sa kagaya ni Dolphy na pinagkaitan ng gobyerno ng isang nararapat na pagkilala para sa kaniyang naging kontribusyon sa pagningning ng sining sa Pilipinas, hindi lamang sa buhay ng maraming mamamayan kundi sa buong bansa sa larangan ng pagbibigay ng saya sa mga tao.

Sinabi ni Castelo na hindi lamang para kay Dolphy ang nasabing award kundi para na rin sa iba pang mga artista at mga nasa larangan ng entertainment na hindi nabibigyan ng sapat na pagkilala ng gobyerno.

Kung maaari anya, si dating Pangulong Erap Estrada ang mag-aabot ng People’s Artist Award sa pamilyang naiwan ni Dolphy.

Idinagdag pa ni Castelo na sa kaniyang pakikipag-usap kay Estrada, sinabi umano nitong kung meron lamang award na higit pa sa national artist award ay ito ang dapat ipagkaloob sa namayapang si Dolphy dahil na rin sa nagawa nitong ambag sa pagpapasigla sa pelikulang Pilipino.