P677-M pa tagong yaman ni Corona

MANILA, Philippines - Mayroon pa umanong mahigit sa P677 milyon ang unexplained wealth ni Corona na hindi nakadeklara sa kaniyang statement of assets, liabilities and networth (SALN).

Sa pagsisiyasat ng fact finding committee ng Ombudsman, lumalabas na nasa P36 milyon lang ang kabuuang asset ng mag-asawang Renato at Cristina Corona simula 2010 hanggang 2012.

Sa naturang report ay nakasaad na si Corona ay kumita lang ng P27.1 milyon mula sa April 2, 2002 hanggang December 31, 2011 habang siya ay nakaupo sa pwesto sa gobyerno.

Subalit may kabuuang P36.7 milyon na peso accounts at $10 milyon na may katumbas na P420 milyon at hindi pa umano kasama rito ang mga natuklasang undeclared o undervalued sa mga idineklarang bahay at lupa ng punong mahistrado.

Sinisilip ng Ombudsman ang mga ari-ariang binili ng mag-asawa na kuwestyunable umano kung saan sila kumuha ng pambayad. (Butch Quejada/Gemma Garcia)