GMA kakandidato sa 2013 kahit may sakit

 MANILA, Philippines - Sa kabila ng pagkaka-hospital arrest at sa dinaramdam na sakit, tatakbo pa rin sa darating na 2013 mid-term elections si dating pangulo at ngayon ay Pampanga Rep. Gloria Macapagal-Arroyo.

Ayon kay House Minority leader at Quezon Rep. Danilo Suarez, mas nakatutok umano si CGMA sa kanyang re-election sa susunod na taon habang ipinapaubaya na lamang nito sa liderato ng Bagong LAKAS-CMD ang pagmamaniobra.

Sa council meeting ng partido, aalisin ang partidong Kampi mula sa Lakas upang malayo sa anino ni CGMA.

Samantala, kinumpirma naman ng pinakamalapit na kaibigan ni CGMA na si Mindoro Rep. Amelita Villarosa na may kaugnayan sa puso ang dinadaing ngayon ng dating pangulo at sinabing “it’s a matter of life and death,” ang kalagayan ni CGMA.

Kamakalawa ay bigla na lamang nagpatingin si Makati Medical Center si CGMA dahil sa umano’y pagkakaroon ng komplikasyon sa naunang operasyon sa leeg na nagdulot ng hirap sa paghinga at paninikip ng dibdib.