2 barko ng China nasa Scarborough pa

MANILA, Philippines - Nagsinungaling umano ang China ng sabihin nitong umalis na sa Scarborough Shoal ang dalawa nilang barko.

Sinabi ni AFP-Northern Luzon Command Chief Lt. Gen. Anthony Alcantara na nagmaniobra lamang pala ang Yuzheng 310 at maritime surveillance ship no. 084 at muling nagbalik sa lugar. Bukod pa ito sa limang barkong pangisda ng China na naroon.

Bunsod nito, muling inihayag ng Pilipinas na hindi nito papayagan na maagaw ng China ang Scarborough Shoal. 

May nakalatag na umano silang contingency measure sakaling lumala pa ang sigalot alinsunod sa direktiba ni Defense Secretary Voltaire Gazmin na bigyang proteksyon ang soberenya ng bansa.

Sa kasalukuyan ay bumalik sa lugar ang BRP Pampanga ng Philippine Coast Guard na pumalit sa BRP EDSa Dos na kailangang kumuha muna ng supplies ng pagkain at magkarga ng krudo. Dumating rin ang MCS 3006 ng Bureau of Fisheries and Aquatic Resources.

Ayon sa AFP, magpapatuloy ang kanilang monitoring sa pagkilos ng China sa Scarborough kung saan ay binabantayan ang posibleng pagtatayo ng mga ito ng istraktura sa lugar. (Joy Cantos/Ellen Fernando)