Gusaling ginigiba sa Quiapo mapanganib

MANILA, Philippines - Mapanganib umano sa mga residente at mga taong nagdadaan sa Quiapo, Maynila ang isang ginigibang building bunsod umano ng kawalan nito ng “safety net” na siyang dahilan upang maglaglagan ang mga tipak na bato, semento at bakal sa kalsada.

Sumulat na kay Manila Mayor Alfredo Lim ang mga residente sa lugar at ipinarating ang peligrosong paggiba sa dating Ginto Cinema building na makikita sa 657 Quezon Boulevard, Quiapo.

Ang liham ay na-receive ng tanggapan ng alkalde nitong Pebrero 27, 2012.

Natatakot na umano ang mga residente na nakatira sa paligid ng ginigibang gusali partikular ang mga nakatira sa Esperanza at Porvenir Sts., na mabulaga at tamaan ng nagbabagsakang mga bato na maari nilang ikapahamak kaya hinihiling nila ang mabilis na aksiyon hinggil dito.

Isa umanong nagngangalang “Dick” ang sinasabing nangangasiwa sa ginigibang gusali.