MANILA, Philippines - Aabot sa 22 miyembro ng Lambda Rho Beta fraternity ang kakasuhan ng pamilya ng napaslang na hazing victim na si Marvin Reglos.
Ayon kay Atty. Dennis Pangan, abogado ng pamilya ng biktima, nakipagkita siya kay Justice Secretary Leila de Lima upang humingi ng affidavit ng isa pang testigo na lumutang kahapon.
Sinabi nito na kaagad din nilang isasampa ang kaso oras na makuha ang mga pangalan ng mga sangkot sa hazing.
Ipinarating din aniya nila kay de Lima ang hiling ng pamilya Reglos na madaliin ang imbestigasyon at nawa’y magkaroon ng patas na pagdinig.
Una rito lumabas ang balita na nahaharap sa expulsion si Eduardo Escobal II, ang grand rhoan o pinuno ng Lambda Rho Beta fraternity sa San Beda College.
Maging ang 30 pang miyembro ng fraternity ay nanganganib din umano na masibak sa nasabing unibersidad.