MANILA, Philippines - Nagbabala kahapon ang ilang senador sa nakaambang constitutional crisis dahil sa hindi pagsunod ng Department of Justice sa temporary restraining order (TRO) na ipinalabas ng Supreme Court laban sa watchlist order kay dating Pangulong Gloria Macapagal-Arroyo.
Ayon kay Sen. Francis “Chiz” Escudero, bagaman at hindi nakakatulong ang “confrontational approach” ng kampo ng mga Arroyo, dapat pa ring sundin ng DOJ ang batas at ang Konstitusyon upang maiwasan ang isang constitutional crisis.
“The Department of Justice (DOJ) should stick to the law and warned that its continued defiance of the Supreme Court order that effectively allowed former President Gloria Macapagal-Arroyo to seek medical treatment abroad could trigger a constitutional crisis,” sabi ni Escudero.
Kung patuloy umanong hindi ipatutupad ng DOJ ang desisyon ng SC ay magkakaroon ng dahilan ang kampo ni Arroyo para humingi ng political asylum sa ibang bansa.
Mistula rin umanong tini-test ni de Lima ang limitasyon ng kaniyang kapangyarihan lalo pa’t sinabi nito na hindi siya takot na ma-contempt ng SC.
Maging si Sen. Miriam Defensor-Santiago ay naniniwala na nakaamba ang isang constitutional crisis kung patuloy na hindi susundin ng DOJ ang desisyon ng SC.
Ayon kay Santiago, sa sandaling magpalabas ng TRO ang Kataas-taasang Hukuman, dapat kaagad itong ipatupad at hindi maaaring pigilan ng motion for reconsideration.
Sinabi naman ni Senate Majority Floor Leader Vicente “Tito” Sotto III na dapat ikonsidera na ni Justice Secretary Leila de Lima na magsagawa ng “overhaul” sa kaniyang mga legal advisers.
Patuloy umanong inilalagay ng DOJ ang kasalukuyang administrasyon sa malaking kahihiyan.