MANILA, Philippines - Dahil sa ginawang ‘dirty finger’ illustration, isang 32-anyos na Pinoy ang inaresto at ikinulong sa Saudi Arabia.
Sa tinanggap na report ni Eric Jocson, chairperson ng Kapatiran sa Gitnang Silangan, nahaharap sa kasong paglabag sa “customary prohibition” ang Pinoy na itinago sa pangalang Willie, tubong Laguna at nagtatrabaho bilang factory worker sa Riyadh. Siya ay ikinulong noong Oktubre 14 sa Azizia Police station matapos na ireport at ipaaresto ng kanyang supervisor sa Mutawa o religious police.
Nahuli umano ng kanyang supervisor si Willie na may hawak na papel kung saan naka-drawing ang ‘dirty finger’ na may ‘offensive meaning’ para sa lahat ng makakakita.
Agad siyang sinita ng kanyang bisor at tiningnan ang nilalaman ng papel hanggang sa itanggi ng nasabing OFW na para sa kanyang boss ang nasabing dirty finger sketch.
Nauna rito, nagkaroon umano ang argumentasyon ang nasabing Pinoy at kanyang supervisor nang magreklamo ang una dahil sa desisyon ng huli na ilipat siya sa ibang job site.
Bunsod nito, hiniling ni John Leonard Monterona, regional coordinator ng Migrante-Middle East sa Embahada ng Pilipinas sa Riyadh na mabigyan ng assistance ang nasabing OFW.
Sinabi ni Monterona na iko-konsulta nila sa isang Shariah lawyer kung ang nasabing drawing ay labag sa customary prohibition.
Naniniwala ang Migrante-ME na ang nararamdamang pagkadismaya sa kanyang supervisor ang nagbunsod upang mag-drawing ito ng dirty finger.