Guro tutol sa make-up class

MANILA, Philippines - Tutol ang mga guro sa kahilingan ng pamunuan ng Department of Education (DepEd) na magkaroon ng make-up class tuwing weekends sa mga lugar na nasuspinde ng dalawang araw ang klase bunsod ng nagdaang bagyong Juaning sa bansa.

Ayon kay Benjo Basas, national chairman ng Teacher Dignity Coalition (TDC), ang araw ng Sabado ay inilalaan ng mga guro sa ibang gawaing bahay at pampamilya na hindi umano dapat kunin pa sa kanila.

Ikinatuwiran pa ni Basas na wala namang dagdag na suweldo sa mga guro para sa dagdag na araw ng trabaho.

“Hindi kontrolado ninuman ang suspensiyon ng klase kabilang na ang mga guro at hindi kami ang dapat pagdusahin sa implikasyon ng suspensyong ito,” sabi pa ni Basas.

Masyado pa anyang maaga ang panawagan ng DepEd para sa pagkakaroon ng make-up classes tuwing weekends.