Kamay na bakal vs corruption

MANILA, Philippines - Nakatuon ang ikalawang State of the Nation Address (SONA) ni Pangulong Aquino sa pagpapatupad nito ng makabagong lipunan na may kamay na bakal sa paglaban sa corruption.

Sinabi ni Presidential Communications Strategic Planning and Deve­lopment Office Sec. Ricky Carandang, tatalakayin ng Pangulo sa kanyang ikalawang SONA ngayong hapon ang transformation ng ating lipunan.

Ayon kay Sec. Carandang, ilalahad ng Pangulo ang anti-corruption effort ng gobyerno upang tuluyang mawalis ang mga katiwalian.

Naunang sinabi ni Pre­sidential Spokesman Edwin Lacierda, hindi maiiwasan ng Pangulo na banggitin ang nakaraang administrasyon dahil maraming katiwalian at problema ang nabungkal dito tulad ng natuklasan ng Philippine Charity Sweepstakes Office (PCSO) bukod sa paglantad ngayon ng mga testigo na nais ding magpatunay sa nalalaman nilang anomalya sa fertilizer fund scam gayundin sa sinasabing dayaan noong 2004 at 2007 polls.

Inaasahang ilalahad din ni PNoy ang kanyang magiging programa sa kanyang ikalawang taon sa gobyerno sa kanyang ikalawang SONA ngayong hapon.