Ilegal na sugal sa Negros pinabubusisi sa DILG

MANILA, Philippines - Mariing hiniling ng tatlong Negros Oriental provincial board member kay DILG Secretary Jesse Ro­bredo ang agarang imbestigahan sa kapwa nila ‘bokal’ na umano’y financier at nagpapatakbo ng illegal­ na sugal na “Suertres” sa dalawang distrito ng lalawigan.

Ayon sa 3 ‘Bokal’ na pansamantalang tumangging magpabanggit ng pangalan, tila bulag at bingi ang mga opisyal ng PNP sa lantarang ilegal na pasugalan sa kanilang lalawigan.

“Talamak na ang operasyon ng ‘Suertres’ sa Negros­ at nagbubulag-bulagan na lang ang mga pulis­ sa Visayas dahil sa milyon pisong payola kada-buwan,” ayon sa tatlong Board Member.

Batay sa impormasyon, sa legal na bolahan ng ‘Suertres’ ng Philippine Charity Sweepstakes Office (PCSO) kinukuha ang mga lumalabas na numero araw-araw.

Noon lamang nakaraang linggo, dalawang mayor na ang sumulat na kay Robredo tungkol sa illegal­ na operasyon ng ‘Suertres’.

Nauna rito, ibinulgar ng isang broadcaster sa Dumaguete City ang ‘payola at protection racket’ sa illegal­ bookies milyon kada-buwan na napupunta sa tiwaling mga opisyal ng PNP.