Sen. Zubiri aalis sa Senado kung...
MANILA, Philippines - Handa si Senator Juan Miguel Zubiri na umalis sa Senado kung mapapatunayang nakinabang siya sa sinasabing dayaan noong 2007 senatorial elections.
Sa isang press conference sa Senado, sinabi ni Zubiri na wala siyang kinausap upang bigyan siya ng pabor sa bilangan kung saan nanalo siya sa ika-12 puwesto na kinuwestiyon naman ni Atty. Aquilino “Koko” Pimentel III na pang-13.
Sentimyento pa ni Zubiri mas pinagtutuunan ng pansin at nalalagay sa mga pahayagan ang sinasabing dayaang nangyari sa Mindanao pero hindi nababalita ang dayaang nangyari sa Metro Manila.
Umaabot umano sa 930 boxes o 186,000 ballots ang walang laman na nadiskubre nila sa kaniyang counter protest.
Sa kanilang pagbibilang, lumalabas na nabiktima rin umano siya ng pandarayang nangyari noong 2007 elections.
Idinagdag ni Zubiri na dapat tapusin na muna ang pagbibilang ng Senate Electoral Tribunal ng mga boto sa Metro Manila at kung hindi umano makahabol ang kaniyang boto ay bababa siya sa puwesto.
Inaasahan umanong matatapos ng SET ang pagbibilang sa Setyembre 2011.
Mismong ang legal team na umano ni Zubiri ang humiling sa SET na bilisan ang proseso upang makita na kung sino talaga ang dapat maupo sa pang-12 puwesto.
- Latest
- Trending
