CHR hinamon ni Duterte sa pag-'dirty finger'

MANILA, Philippines - Hinamon kahapon ni Davao City Vice Mayor Rodrigo Duterte ang Commission on Human Rights (CHR) na sampahan siya ng kaso sa ipinakita niyang “dirty finger” habang iniinterbyu sa telebisyon noong Lunes.

Ito ang reaksyon ng bise alkalde bilang tugon sa panghihimok ni CHR Chairman Etta Rosales kay Interior and Local Government Secretary Jesse Robredo na turuan ng leksyon ang matandang Duterte.

Sinabi ni Duterte na maaring gawin ng CHR ang anumang nais nito pero nililinaw niyang karapatan lamang niya ang ginawang dirty finger bilang bahagi ng ‘freedom of expression “.

“What is your characterization of a dirty finger? Verbal abuse, what does it mean to you? You do not curtail my freedom of expression.  The constitution guarantees me that right.  It is my constitutional right to express myself with either my mouth or my finger.  It is also my birth right. Nobody but nobody could curtail me that right,” paalala pa ng bise alkalde sa CHR.

“That’s freedom of expression. I’m disgusted eh. Hirap na nga kami dito sige pa sila yakyak dyan,” dagdag pa nito.

Iginiit pa nito na hindi siya hihingi ng sorry o paumanhin sa pagdi-dirty finger sa telebisyon na labis na ikinairita ni Rosales.

Noong Lunes ay nagpakita ng dirty finger si Duterte laban sa mga kritiko ng anak nitong si Davao City Mayor Sara “Inday’ Duterte na nasangkot sa pananapak kay Sheriff Abe Andres sa kaguluhan sa demolisyon sa Agdao District sa lungsod noong Hulyo 1.