PCSO: Walang Pajero sa mga Obispo

MANILA, Philippines - Walang sasakyang Pajero na ibinigay sa mga Obispo.

Ito ang pahayag ni Philippine Charity Sweepstakes Office (PCSO) chairperson Margie Juico sa Senado kaugnay ng kontrobersya na may ilang obispo na tumanggap ng donasyong Pajero mula sa PCSO nung panahon ni dating Presidente Gloria Arroyo.

Aniya, walang donasyong Pajero sa mga Obispo ng Simbahang Katoliko na idinawit sa usaping ‘Pajero Bishops,’ taliwas sa mga naunang naglabasang balita.

Ipinapalagay naman ng ilan na ito’y isang “intrigang” ipinakakalat para wasakin ang relasyon ng Pangulo sa Simbahang Katoliko.

Sa hearing ng Senate Blue Ribbon Committee sa pangu­nguna nina Sen. TG Guingona, Sen. Panfilo Lacson, Senate President Juan Ponce Enrile, Sen. Franklin Drilon at Sen. C hiz Escudero, kinumpirma ni Juico na sa aktwal, walang mamahaling sasakyan katulad ng Pajero na nagkakahalaga ng halos P3 milyon bawat isa (brand new), na naipamahagi sa mga Obispo.

Batay sa rekord ng PCSO na binasa ni Juico, kabuuang P6.940 milyon ang inilaan ng nakaraang liderato ng PCSO sa donasyon kung saan ibinigay ito sa Archdiocese ng Zamboanga, Butuan, Cotabato, Nueva Segovia at Isabela, Basilan.

Aniya pa, “dumaan sa pro­seso” ng PCSO ang kahilingan kung saan isang Toyota Grandia ang napunta sa Archdiocese of Zamboanga; isang Isuzu Crosswind naman sa Nueva Segovia, Ilocos Sur; isang Isuzu passenger van sa Bontoc-Lagawe para sa proyekto nitong “Alay-Kapwa,” isang Mitsubishi Montero sa Archdiocese ng Butuan; at isang Mitsubishi Strada naman sa Archdiocese ng Basilan.

Bago ang pag-amin ni Juico, kinumpirma rin ni PCSO director Aleta Tolentino na wala ring natanggap na sasakyang Isuzu Altera ang Archdiocese ng Iligan City para magamit ng crisis center nito sa pangunguna ni Fr. Roger Lood, dahil hindi umano nito nakumpleto ang mga kailangang dokumento para sa donasyon.

Ani Juico, “maaring” kwes­tyunable ang mga naturang donasyon dahil posibleng labag ito sa prinsipyo ng ‘separation of Church and State’ na nakasaad sa Saligang Batas, bukod sa tanging mga ambulansya lang ang ipinamamahagi ng PCSO, batay na rin sa ‘charter’ nito.

Bunga ng resulta ng paunang imbestigasyon kahapon, tumibay naman ang hinala ng ilang grupo na may ‘sumasabotahe’ sa relasyon ng Simbahan at ng Malacañang.

“Hindi kaya nakakahalata ang PCSO na posibleng nagagamit ang ahensiya para lang magalit ang mga Obispo kay Pang. Noynoy Aquino dahil pinalaki ang isyung ito kahit wala naman palang matibay na ebidensiya,” tanong pa nila.

Bago pumutok ang kontro­bersiya, matatandaan na mainit na ang bangayan ng Palasyo at Simbahang Katoliko dahil na rin sa isyu ng reproductive health (RH) bill.

Nakaranas na rin ng pagba­tikos si P-Noy kay Butuan Archbishop Juan de Dios Pablos, dahil umano sa “mahinang” li­derato nito.

Ngayong araw itutuloy ang pagdinig kung saan isasalang naman ang mga bumabatikos sa PCSO.