CEBU, Philippines - Wala na usab mahinayon ang gikatakda untang public viewing sa sulod sa USB ug video camera nga gipanag-iya ni Bella Ruby Santos ang gitumbok nga suspetsado sa pagdagit patay ni Ellah Joy Pique. Kagahapong adlawa sa wala pa magsugod ang public viewing gipatawag ni RTC-Branch 13 Executive Judge Meindrado Paredes ang kampo sa Criminal Investigation and Detection Group ug ang kampo ni Santos alang sa preliminary conference.
Atol sa maong conference, gibutyag ni Paredes nga naglisod siya pagkuha og Information Technology expert apan mikuha nalang siya og tulo ka komisyoner nga maoy mosaksi atol sa viewing.
Kini naglangkob sa iyang clerk of court nga si Atty. Jessica Capacio, Ann Roa nga iyang Court Interpreter ug ang iyang estudyante sa law nga si Lovely Velayo nga gihulagway niyang dili bias.
Mibutyag usab si Paredes nga kun walay makita nga magamit sa kaso iyaha ipauli kang Santos ang USB ug digital camera.
Apan si Atty. Inocencio Dela Cerna sa CIDG miingon nga base sa balaod kinahanglang adunay IT expert gikan sa gobiyerno nga maoy mobukiki sa mga USB aron masuta ang petsa ug oras kanus-a kini gikuha. (BANAT NEWS)