Brgy. Chairman nilikida

MANILA, Philippines - Patay ang isang Brgy. Chairman matapos itong pagbabarilin ng hindi pa nakilalang armadong salarin sa isang liblib na lugar sa bayan ng Mabitac, Laguna kamakalawa ng gabi.

Kinilala ang nasawing biktima na si Luis Tolledo, 54 anyos, nasa ikatlong termino bilang Chairman sa Brgy. Lucong.

Ang biktima ay idineklarang dead on arrival sa isang hospital sa bayan ng Pakil ng lalawigang ito.

Bandang alas-7 ng gabi nang biglang sumulpot ang nag-iisang suspek na nakasuot ng kulay itim na jacket sa basketball court ng nasabing barangay.

Armado ng kalibre .45 pistol ay agad na pinagbabaril ng salarin ang biktima at ng duguang itong napalugmok sa tinamong tama ng bala sa sentido ay mabilis na tumakas patungo sa hindi pa malamang destinasyon.

Bago ang insidente ay nakatanggap ng death threat ang biktima mula sa nagpa­kilalang grupo ng mga rebelde sa pamumuno ng isang alyas Ka Ellen.