MANILA, Philippines - Hiniling ni Lauro Vizconde na mag-inhibit ang dalawang Supreme Court (SC) Justice sa pagdinig sa “final verdict” ng Vizconde massacre case.
Sa ginanap na pulong balitaan sa Tinapayan sa Bustillos, tinukoy ni Dante Jimenez, founding chairman ng Volunteers Against Crime and Corruption (VACC), ang dalawang mahistrado na sina Justices Antonio Carpio at Conchita Morales Carpio, na umano’y magpinsan at parehong nasa hanay ng hudikatura ng SC.
Ayon kay Jimenez, base sa alegasyon ni Vizconde si Antonio ay matagal na umanong kumikilos para ma-impluwensiyahan ang kaso ng Vizconde.
Sinabi ni Jimenez na walang ginawa si Lauro Vizconde kundi tutukan ang kaso at makuha ang hustisya. Mas makabubuti umano kung aalis muna ang mga Carpio sa SC habang dinidinig ang kaso dahil wala ng mga susunod na mosyon kapag nakapagpalabas na ng final decision ang Korte Suprema.
Hiniling rin ni Jimenez sa SC na magkaroon ng live coverage sa pagdinig sa ilalabas na final decision ng SC sa kaso ng Vizconde massacre. Kailangan umano na magkaroon ng transparency sa pagpapalabas ng final decision sa kaso.