Scholarships, libro pamalit sa K+12

MANILA, Philippines - Posible umanong du­mami ang mga batang hindi makakapag-aral dahil sa isinusulong na K+12 program ng Department of Education.

Ayon kina Manila Crusaders for Peace and Democracy (MCPD) president Ben Perez at Citizens’ Crusade for Peace and Pro­ gress (CCPP) president John Dee, kontra ma­hirap at malaking kalo­kohan ang pagpupumilit ng karag­dagang dalawang taon sa elementary at high school.

Ayon kay Perez, hindi lahat ng bata ay nakaka­tapos ng high school dahil sa kakapusan ng pondo ng kanilang mga magulang.

“Sa K plus 12, karag­dagang dalawang taon ng baon, uniporme, pama­sahe, school supplies at iba pang pangangailangan para sa bata. Hindi ito popondohan ng Gobyerno. Kung walang pagkukunan ang mga magulang, pa­ano,” ayon kay Perez.

Sinabi rin ni Dee, na anuman ang itayo o bilihin nila para sa K plus 12 ay walang silbi kung mas kaunti o walang estud­yanteng gagamit ng mga ito dahil lamang sa hindi na kaya ng kanilang mga ma­gulang ang karag­da­gang gastos pang-iskuwela.

“Ang mahigit P60 billion na gagastusin sa K plus 12 ay sapat na para sa ilam­pung libong iskolarship para sa mga batang mahi­hirap o sa libu-libong ka­kulangan sa libro na Gob­yerno na mismo ang nag­sasabi,” ayon kay Dee.

“Anong klaseng tra­baho — messenger, janitor? Mga professional ang hinahanap ng mga kum­panya at hindi lamang high school graduate. College education ang kailangan ng mga bata, hindi dagdag na dalawang taong pa­hirap para sa kanilang mga magulang,” tugon nila sa sinabi ni DepEd Sec. Armin Luistro na sa K plus 12, mas magi­ging madali sa mga bata ang makahanap ng tra­baho pagkatapos ng high school.