Ekonomiya sesemplang

MANILA, Philippines - Posibleng malugmok muli sa burak ng kahirapan ang nakakaraming mama­mayan dahil kaalyado at kakampi na ng Liberal Party ang arkitekto ng kahirapan sa panahon ni Pangulong Gloria Maca­pagal-Arroyo.

Inihayag ito ng Na­cionalista Party matapos sumanib sa LP si Albay Gov. Joey Salceda na pa­ngunahing economic adviser ni Pangulong Arroyo at gumawa ng patakarang mayayaman lamang ang nakinabang. Nangunguna na nga sa listahan ang ka tandem nito mismo na si Senador Mar Roxas na nagsilbi bilang trade secretary ni Arroyo.

Bukod kay Salceda na nagpatupad ng nabigong isang milyong trabaho kada taon sa adminis­trasyon ni Pangulong Arroyo, kasama rin sa Liberal Party ang iba pang economic managers ng ka­salukuyang adminis­tras­yon na nagpataas ng buwis na siyang nagpa­hirap sa taumbayan.

Partikular na tinutukoy ng NP si dating economic planning secretary Ralph Recto na nagpasimuno ng pagsasabatas ng Expanded Value Added Tax mula dating 10% tungo sa 12% sa lahat ng uri ng produkto at serbisyo.

“Nasaan ang isang milyong trabaho na ipi­nangako ng economic adviser ni Pangulong Arroyo noon tulad ni Salceda? Di ba mas maraming pamil­yang Filipino ang walang makain sa pamamahala ni Salceda sa ating eko­nomiya,” giit ng NP.