Nograles dismayado sa Comelec

MANILA, Philippines - Dismayado si House Speaker Prospero C. Nog­rales sa Commission on Elections sa umano’y ka­pa­bayaan nito sa tungkulin na magpatupad ng isang malinis at mapayapang eleksiyon, dahil sa uma­no’y pagkabigo ng ahen­siya na ipatupad ang total gun ban.

Ayon kay Nograles mismong sa Davao City, may mga lokal na opisyal, opisyal ng barangay at maging mga motorcycle-riding goons na walang takot na kumakalat sa lugar at ni hindi itinatago ang kanilang mga baril sa publiko. Mayroon din uma­nong mga miyembro ng New People’s Army na malayang paka­lat-kalat sa mga barangay upang manakot ng mga tao at mga bolun­taryong nanga­ngam­pa­naya para sa mga lokal na kandidato rito na tuma­tangging magbigay ng protection money sa grupo ng NPA.

Pinuna ni Nograles, dahil sa patuloy na pag­tanggi ng Comelec na ilagay ang Davao City sa ilalim ng full Comelec control, mayroon ng dalawang tao ang nagbuwis ng buhay, ito ay ang mga cam­paign volunteers ng Bantay Party-list group na pina­mumunuan ni retired Major General Jovito Pal­paran, na kilalang anti-com­munist advocate at kritiko ni Mayor Rodrigo Duterte.

Bukod dito, hanggang sa kasalukuyan ay hindi pa rin umano kumikilos ang Comelec upang linisin ang voter’s list kung saan may­roong humigit-kumulang sa 40,000 multiple/double at dead registrants sa Davao City at Davao del Sur, ilan sa mga nasa talaan ay kapatid at anak umano ni Mayor Duterte.