NTC kontra sa VOM TRO

MANILA, Philippines - Mariing tinututulan ng National Telecommunications Commission (NTC) ang kahilingan ng Voice of Manila (VOM) sa Regional Trial Court, Branch 265 ng Pasig City sa ilalim ni Judge Danilo Buemio, na maka­pag­hain ng Temporary Restraining Order (TRO).

Nais ng VOM na ma­ipatigil ang pagpapatupad ng limang taon ng Memorandum Circular (MC) 06-08-2005 na naglalayong maibigay na sa iba ang iba pang natitirang frequency bands bilang pagkilala ng nasabing ahensiya sa pag­papaunlad at pagpapa­takbo ng telecommunications networks at services na pumapabor sa Broadband Wireless Access (BWA) technology.

Ayon sa NTC, ang na­turang petisyon ay walang basehan at hiniling ang agarang pagbasura dito dahil na din sa pagku­kulang ng VOM na mahi­kayat ang iba pang telecommunications company na kasama sa usaping ito na siya ding naging dahilan upang maglabas ng MC.

Sinabi pa ng NTC na ang ibang kompanya na nabigyan ng frequency sa ilalim ng nasabing MC ay nakapagsimula nang mag­lagay sa iba’t ibang ba­hagi ng bansa ng kani­lang mul­ti-bilyong pisong halaga ng telecommunications infrastructure para sa kani-kanilang frequency.

Idinagdag pa ng NTC na ang patuloy na pag­ko­ntra sa pagpapatupad ng MC ay lubhang magdu­dulot ng negatibong epekto sa iba pang telecommunications companies at sa bu­ong indus­triya sa kabuuan.