Bangit bagong hepe ng AFP

MANILA, Philippines - Inihayag kahapon ni Pa­ngulong Gloria Ma­ca­pa­gal-Arroyo na si Army Chief Lt. Gen. Delfin Bangit ang susunod na chief of staff ng Armed Forces of the Philippines kapalit ni Gen. Victor Ibrado na magre­retiro bukas matapos nitong ma­abot ang mandatory na retiring age na 56.

Si Bangit na nagsilbi bilang hepe ng presidential security group ni Mrs. Arroyo ay naunang nahi­rang na hepe ng Philippine Army at miyembro ng PMA Makatarungan Class of 1978.

Si Bangit ang magi­ging ika-40 hepe ng AFP at ika-11 hepe ng militar sa buong panahon ng panunungkulan ng administrasyong Arroyo.

Nangako si Bangit na paiiralin ang propesyuna­lismo at disiplina sa hanay ng 125,000 malakas na puwersa ng AFP.

Isasagawa naman ang turnover ceremony o pagsasalin ng kapangyarihan ni Ibrado kay Bangit sa Marso 10 na inaasahang dadaluhan ni Pangulong Arroyo bilang panauhing pandangal.

Ayon naman kay Ibra­­do, isang mahusay na opis­­yal si Bangit at kara­pat­dapat itong maging suc­cessor niya bilang Chief of Staff.