MANILA, Philippines - Sinubpoena na ng Department of Justice para sa susunod na preliminary investigation sina Senator Panfilo “Ping” Lacson at iba pang miyembro ng binuwag na Presidential Anti-Organized Crime Task Force para sa kasong kidnapping at serious illegal detention na inihain ni Mary Rose Ong akyas Rosebud.
Sa inisyung subpoena ni State Prosecutor George Yarte Jr., itinakda ang pagdinig sa Marso 11.
Kabilang sa pinagbatayan sa kasong kidnapping at serious illegal detention ang sinumpaang salaysay nina Ong at Remis Garganera ng Intelligence Service of the Armed Forces of the Philippines at anim na iba pang nagtuturo sa mga miyembro ng PAOCTF na responsable umano sa pagdukot sa dalawang Chinese nationals na pinaghinalaang miyembro ng drug ring na sina Chong Hiu Ming at Wong Kam Chong noong Disyembre 30, 1998 at Marso 26, 1999 nang si Lacson ay hepe pa ng PAOCTF. (Ludy Bermudo)