US envoy hanga sa BI reforms
MANILA, Philippines - Ikinatuwa ng United States embassy ang ipinatupad na reporma sa Bureau of Immigration (BI) ni Commissioner Marcelino Libanan.
Sa ginawang pagbisita ng mga opisyal ng US embassy sa gusali ng BI sa Intramuros Maynila sa pangunguna ni Consul General Karen Christensen, ikinagalak nito ang bagong itsura ng BI.
Sinabi ni Christensen na ang pagbabago at reporma na ginawa ni Libanan ay isang malaking tulong para sa improvement ng imahe ng Pilipinas sa paningin ng mga foreign travellers at dayuhang negosyante.
Ang pahayag nito ay ginawa habang nililibot nila ang ibat ibang tanggapan sa BI building na mayroon nang mga makabagong komunikasyon at computer facilities.
Kabilang sa mga tanggapan na binisita ng delegasyon ay BI national operations center, Interpol unit, anti-fraud division, at ang information technology at records sections.
Ang mga makabagong pasilidad ay nailagay lamang ng maupo si Libanan noong Mayo 2007.
Pinapurihan din ng US embassy delegations ang mga ipinatupad na programa ni Libanan kabilang dito ang visa-issuance-made-simple (VIMS) scheme, na napagaan ang proseso para sa aplikasyon ng mga visa, pre-arranged visa para sa mga dumating na dayuhang negosyante at ang special visa for employment generation (SVEG).
Nagulat din ang delegasyon ng kanilang mabatid na mayroon ng equipment ang BI na machine readable passports. (Butch Quejada)
- Latest
- Trending
