Korte kumampi sa oil firms

MANILA, Philippines - Nawalan ng saysay ang petisyon ng grupong Social Justice Society at transport group na Pasang Masda laban sa pagpapatupad ng pani­bagong pagtataas sa presyo ng mga produkto ng malalaking kumpanya ng langis.

Dinismis kahapon ng Manila Regional Trial court Branch 26 Judge Silvino Pampilo ang pe­tisyon dahil wa­lang ba­sihan bukod sa apek­tado din ang mga lokal na kumpanya ng la­ngis sa galaw ng presyo nito sa pandaigdigang pa­milihan.

Kinatigan ng korte ang testimonya ni dating National Economic Development Authority Chief Solita Collas-Mon­sod na ang magka­ka­sunod na pagtataas ng presyo ng langis na isinasagawa ng mga kumpanya ng langis ay hindi agad nanganga­hulugan na may sab­watan na ang mga ito. Kumpara sa ibang bansa ay nanatili pa rin na mababa ang presyuhan ng langis sa Pilipinas.

Tulad umano sa international market ay pa­rehas na sitwasyon din ang kinakaharap ng mga oil companies kaya sa oras na may paggalaw ng presyo ay walang opsyon maliban sa mag­taas ng presyo sa lokal na merkado.

Ang kaso ay nag-ugat sa akusasyon ng SJS na ang Pilipinas Shell, Chevron at Petron ay sangkot sa cartelization at kasu­nod nito ay hiniling na pagbawalan ang mala­laking kumanya ng langis na magtaas ng presyo kada linggo.