GMA tuloy sa Kongreso

MANILA, Philippines - Nagdeklara kaha­pon si Pangulong Gloria Macapagal-Arroyo na tatakbo na siyang kon­gresista sa ikalawang distrito ng Pampanga ma­tapos ang matinding ‘panliligaw’ ng kanyang mga cabalen na maging kinatawan siya sa Kon­greso.

Ayon sa Pangulo, ikinunsidera niya ang kahilingan ng kanyang mga cabalen sa 2nd district ng Pampanga na naging batayan niya upang tumakbong kon­gresista sa darating na 2010 elections.

Sinabi naman ng abogado ni Gng. Arroyo na si Atty. Romulo Ma­calintal na hindi naman makakaapekto sa kan­yang trabaho bilang Pangulo ang pagtakbo nitong kongresista at, bagkus, patuloy pa rin ang kanyang pagliling­kod sa taumbayan.

Sinasabi sa isang report na isang kinata­wan ng Pangulo ang magsusumite ng kan­yang certificate of candi­dacy sa lokal na tang­gapan ng Comelec sa Lubao, Pampanga.

Hanggang mama­yang hatinggabi ang pagsasampa ng COC ng mga kandidato sa pambansang halalan.

Nagpahayag naman ng paniniwala sina Se­nator Mar Roxas at Se­nate Minority Leader Aquilino Pimentel Jr. na tatakbong kongresista si Pangulong Arroyo para proteksiyonan ang kani­yang sarili sa kung anu-anong kasong po­sibleng isampa sa ka­niya sa sandaling ma­kababa na sa puwesto. “Yung mga may sabit at takot na ma-file-an ng mga kaso. Tumatakbo dahil sa akala nila pro­tek­syon ito,” sabi ni Roxas.

Ayon naman kay Pi­mentel muli na na­mang binali ng Pangulo ang ka­niyang pangako na hindi na kakandidato at siguradong kaka­sang­kapanin nito ng kapang­yarihan upang protekta­han ang kani­lang sarili laban sa opo­sisyon.