MANILA, Philippines - Girlfriend, mga kaibigan at hindi mga bayarang prostitute ang mga babaeng bumibisita sa mga sundalong Amerikano na tumutuloy sa mga base ng militar sa Mindanao.
Sinabi ni Visiting Forces Agreement (VFA) Executive Director ret. Lt. Gen. Edilberto Adan na masyadong unfair na tawaging mga prostitute ang mga Pinay na naging girlfriend at kaibigan ng mga sundalong Kano na nagsasagawa ng humanitarian mission sa bansa partikular na sa Mindanao.
“It’s too unfair to label them as prostitute, they cannot be considered as women of ill refute, yung iba dun mga girlfriend na mismo ng mga GI’s, they make friends,“ ani Adan.
Nauna nang ibinulgar ni whistleblower at dating Navy Lt. Mary Nancy Gadian na ginagawa umanong motel ng mga GIs na kumukuha ng serbisyo ng mga Pinay na prostitute ang mga tinutuluyan nitong kampo sa Mindanao.
Sinabi ni Adan na walang katotohanan ang alegasyon ni Gadian lalo pa at inamin mismo nito na may nakapagsabi lamang sa kaniya at hindi naman niya direktang nasaksihan ang huling pinasabog na kontrobersya.
Idinagdag pa ng opisyal na malaki ang naitutulong ng VFA sa pagsupil sa pandaigdigang banta ng terorismo at sinabi pa na nagagamit lamang si Gadian ng anti-government forces kaugnay ng expose nitong sumasali sa combat operations ang tropang Kano. (Joy Cantos)