MANILA, Philippines - Dinodoktor umano ang report ng blue ribbon committee ng Senado sa ginawa nitong imbestigasyon sa naudlot na maanomalyang national broadband network project ng pamahalaan at ng ZTE Corp. ng China.
Ito ang pasaring kahapon ng isang negosyanteng testigo sa anomalya na si Joey de Venecia III na nagsabing dapat nang ipalabas ng tagapangulo ng komite na si Sen. Richard Gordon ang report.
Ikinababahala ni de Venecia na habang papalapit ang halalan, maaaring magamit ang report bilang sandatang pulitikal at hindi na malalaman ang mga katotohanan sa iskandalo sa NBN.
Pinuna ni de Venecia na napakatagal na umanong inuupuan ni Gordon ang report kaya napagsu suspetsahang mababago ang orihinal na report ng komite na ginawa noong panahon ng dati nitong tagapangulong si Senador Alan Peter Cayetano.
Sinabi pa ni de Venecia na, ayon sa kanyang impormante, binago ang Cayetano report para masabit siya sa anomalya at iabsuwelto sina First Gentleman Mike Arroyo at dating Commission on Elections Chairman Benjamin Abalos. (Butch Quejada)