Cory 'di na kayang mag-chemo

MANILA, Philippines – Medical procedures na lang ang nagpa­pa­lawig ngayon sa buhay ni dating pangulong Co­razon Aquino na duma­ranas ng sakit na colon cancer.

Ito ang nabatid kaha­pon sa television host at aktres na si Kris na nag­sabi pa na hindi na kaya ng katawan ng kanyang ina ang procedures ng chemotherapy.

Nilinaw din ni Kris na hindi kailanman nakitaan ng panghihina ng kalo­oban ang kanyang ina at hindi rin ito ang umayaw sa chemotherapy kundi hindi na kaya ng kata­wan ng dating Pangulo.

Sinabi pa ni Kris na, bagama’t batid ng kani­ lang pamilya na talagang wala pang permanenteng lunas sa pinagdadaanan karamdaman ng kanilang ina, simula’t sapol ay wala pa rin silang tigil sa pag-hikayat sa dating Pangulo na subukan ang lahat ng paraang medical para labanan ang kanser.

Kabilang sa mga pi­nagdaanang proseso ng dating Pangulo ang colon surgery, selective internal radiation therapy procedures, at ilang be­ses na chemotherapy na ngayon ay hindi na kayang tang­gapin ng katawan nito.

Binanggit pa ni Kris na noong nakaraang buwan ay hinintuan na ang chemotherapy sessions sa dating Pangulo dahil mas­yado nang mahina ang pangangatawan nito.

Sinabi pa ni Kris na sa ngayon ay iniibsan na lamang ang sakit na nararamdaman sa ka­tawan o pagdurusang pisikal ng kanilang ina at pinapalawig na lamang sa ngayon ng ilang pro­sesong medical ang bu­hay nito. (Rose Tesoro)