Panlaban sa H1N1 virus, online enrollment sa universities ikinakasa

MANILA, Philippines – Inoobligahan nang magpa-enroll sa mga pamantasan sa Metro Manila sa pamamagitan ng internet ang mga da­yuhang estudyante bilang bahagi ng pag-iingat la­ban sa influenza AH1N1 flu virus.

Partikular na inoobli­gahan sa online enrollment ang mga dayuhang estudyante na hindi pa dumadaan sa 10 araw na quarantine.

Isang halimbawa rito ang University of the East na nagpayo sa mga es­tudyanteng dayuhan na magpatala sa pamama­gitan ng website ng UE. Sinabihan din ang mga estudyanteng Pilipino na nanggaling sa ibang bansa na magpa-self quarantine muna para makatiyak na malayo sila sa naturang sakit.

Gumastos rin ang uni­bersidad para maglagay ng “thermo scanners” sa mga campus nito upang mamonitor ang tempara­tura ng mga estudyan­teng pumapasok.

Kinansela naman ng University of the Philippines ang tradisyunal na “welcome assembly” ka­hapon. Sinasabing ang UP ang may pinakama­ra­ming dayuhang estud­yante.

Mamahagi rin naman ang Polytechnic University of the Philippines ng mga “campaign materials” kontra A/H1N1 flu at nakaalerto ang medical staff nito sa pagbubukas ng klase sa Lunes.

Sa Ateneo de Manila University, sinabihan din ang mga dayuhan at lokal na estudyanteng nag­buhat sa ibang bansa na magpakuwarantina muna.