GMA naghanap ng basurahan, nairita

MANILA, Philippines – Nairita kahapon si Pangulong Gloria Maca­pa­gal-Arroyo nang ma­bigo siyang makakita ng basu­rahan makaraang sabayan niya sa tamang paghuhu­gas ng kamay bilang ba­hagi ng pag-iingat laban sa A(H1N1) virus ang mga mag-aaral sa Geronimo Santiago Elementary School sa San Miguel, Manila.

Napasimangot ang Pangulo nang matuk­lasan niyang walang ba­surahan na puwedeng pagtapunan ng ginamit niyang tissue paper sa pagpunas ng kanyang kamay sa ginanap na “handwashing” demons­tration sa mga mag-aaral kahapon.

Ipinakita ni Mrs. Arroyo sa mga mag-aaral ang tamang paghuhugas ng kanilang mga kamay at kumanta pa ito ng “happy birthday” habang nagsasa­bon ng kanyang kamay kasama ang mga estud­yante.

Nang magpunas ng tissue paper sa kanyang ka­may ang Pangulo ay nag­hanap na ito ng trash can na puwedeng pagta­punan ng ginamit niyang tissue paper pero wala siyang nakita sa lugar na kinata­tayuan niya.

“Nasaan ang basura­han,” wika pa ni Pangu­long Arroyo sa mga health official ng nasabing pa­aralan.

Tumagal nang ilang minuto bago may magbi­gay ng cardboard box kay Pangulong Arroyo kung saan ay itinapon naman nito ang ginamit niyang tissue paper.

Ipinaliwanag ng mga school officials na may­roong cardboard box na inilagay sa ilalim ng “faucet” subalit inalis ito para sa “convenience” ng Pa­ngulo kaya isang cardboard box ang ibinigay dito ng mag­hanap ng basurahan su­balit na­dismaya ang pu­nong ehekutibo dahil to­toong basurahan ang kan­yang inaasahan. (Rudy Andal)