1 pang Pinay ginahasa ng sundalong Kano
MANILA, Philippines – Isa pang 22-anyos na Pilipina ang lumantad kahapon at nagsabing ginahasa siya ng isang sundalong Amerikano.
Itinago sa alyas na Vanessa ang biktima na dumalo sa isang pulong-balitaan sa opisina ng partylist group na Gabriela para ihayag ang kanyang karanasan.
Sinabi ni Vanessa na ginahasa siya ng sundalong tinawag lang niyang John Jones sa isang five-star hotel sa Makati City.
Sinabi naman ng Gabriela na nakumpirma nila na ang suspek ay nakalista sa rekord ng hotel bilang siyang sundalo na nagmula sa Joint US Military Assistant Group at RP-US joint military exercise.
Pero sinabi ng abogadong si Evalyn Ursua na hindi pa nagpapasya si Vanessa kung magdedemanda.
Matatandaang si Ursua rin ang dating abogado ni Suzette Nicolas alyas Nicole na nagreklamong ginahasa ito ng sundalong Amerkanong si Lance Corporal Daniel Smith sa Subic noong 2005.
Nasentensyahang makulong si Smith pero pinalaya siya kinalaunan nang bawiin ni Nicole ang kanyang reklamo.
- Latest
- Trending
