22 Pinoy seamen binihag na naman sa Somalia

MANILA, Philippines - May 22 pang Pinoy seamen ang binihag ng mga Somali pirates sa Gulf of Eden kamakalawa ng gabi.

Ang mga biktima ay lu­lan ng barkong M.V. Irene E.M. na patungo sa India nang harangin ito ng mga pirata sa naturang karagatan.

Naganap ang insi­dente kahit hindi pa napa­palaya ang halos 100 tri­pulanteng Pinoy na na­unang na-hijack ng mga piratang Somali. 

Ayon kay Ed Malaya, tagapagsalita ng Department of Foreign Affairs, mula sa dating bilang na 98, umakyat na sa 120 Filipino seaman ang ha­wak ngayon ng mga Somali pirates.

Samantala, ikinokon­sidera na ng Malacañang na pagbawalan ang mga Pinoy seamen na suma­kay sa mga barkong da­daan sa Gulf of Aden sa Somalia.

Sinabi ni Executive Secretary Eduardo Er­mita na humihingi na sila ng rekomendasyon mula sa Department of Foreign Affairs at Department of Labor and Employment kung kailangan bang mag­pa­tupad ang gobyerno ng ban.

Tiniyak naman ni Er­mita na hindi pababayaan ng gobyerno ang mga ito at mahigpit ang gina­gawang monitoring sa hakbang ng mga manning agencies para mapa­laya ang mga Filipino seafarers.

Lumiham na rin ang Pilipinas sa United Nations kaugnay sa tuma­taas na bilang ng nabibi­hag na Pinoy seamen sa Somalia. (Ellen Fernando/Rudy Andal)